Gripur mánaðarins - September

September runninn upp og allt komið í rútínu! Eftir langt og ljúft sumarfrí er skólinn því aftur hafinn og allt gengur sinn vanagang. Margt hefur breyst á síðustu árum og áratugum hvað varðar kennsluhætti og skólagöngu barna en árið 1907 voru í fyrsta sinn sett lög um skólaskyldu á Íslandi. Hún hefur síðan þá lengst úr fjórum og upp í tíu ár.

Gripur septembermánaðar tengist einmitt skólagöngu en hann var gefinn á safnið af Vilhjálmi Hjálmarssyni (1914-2014) frá Brekku í Mjóafirði. Þetta skemmtilega skólaspjald sem sýnir mynd af beinagrind manns var keypt í grunnskólann í Mjóafirði í kringum 1930 og man Vilhjálmur eftir því að hafa notað það í kennslu þar 1936-47 sem og 1956-67. Það hefur því nýst ansi vel við skólann og eflaust mikið lengur en það. Spjaldið er eitt af fjölmörgum sem Vilhjálmur gaf á safnið árið 1985.    

Nánari upplýsingar um gripinn á Sarpi.

Ýttu hér til að sjá fleiri gripi mánaðarins.