Starfsstefna

Minjasafn Austurlands setur sér starfsstefnu á fjögurra ára fresti þar sem áherslur starfseminnar næstu árin eru tíundaðar og sett fram markmið sem ætlunin er að ná á tímabilinu.

Starfsstefna Minjasafns Austurlands 2025-2029

1. Fagmennska, mannauður, húsnæði

Markmið:
Að tryggja faglega og ábyrga stjórnun safnsins, efla mannauð og bjóða upp á viðeigandi aðstöðu fyrir starfsfólk og gesti.

Umræða og leiðir að markmiði:

Auka samstarf við önnur söfn innan svæðis sem utan, háskóla og rannsóknarstofnanir til að efla faglega þekkingu og menningarstarfsemi á Austurlandi.
Áhersla á þjálfun og símenntun starfsfólks í varðveislu menningarminja, fræðslu og sýningargerð auk þess að tryggja viðeigandi vinnuaðstöðu og tækjabúnað.
Tryggja að safnið fylgi þeim stefnum sem mótaðar hafa verið af hálfu hins opinbera, lögum, alþjóðlegum siðareglum (ICOM) og öðrum sáttmálum og leiðbeiningum sem gagnlegt er að taka mið af í faglegu starfi.
Hafa starfsumhverfi og húsnæði uppfylli faglegar kröfur, sé aðgengilegt og þægilegt fyrir bæði starfsfólk og gesti.
Tryggja að safnið hafi viðeigandi aðstöðu til að sinna verkefnum sínum og til að mæta ólíkum hópum gesta.

Mælingar á árangri:

Fjöldi samstarfsverkefna við fagaðila.
Fjöldi fræðsludaga og námskeiða sem starfsfólk sækir.
Stöðumat á ástandi tækjabúnaðar og aðstöðu.
Nýr hluti Safnahúss hafi verið tekinn í notkun.
Ánægja starfsfólks og gesta með aðstöðu og þjónustu safnsins, t.a.m. með gerð viðhorfskönnunar einu sinni á gildistíma.
Fagleg vottun, s.s. eftirlit Safnaráðs, og viðurkenningar sem safnið hefur fengið fyrir starfsemi sína.

Athugasemdir:
Öflugt og hæft starfsfólk er lykillinn að árangri safnsins. Áhersla verður lögð á að halda vel utan um mannauðinn og tryggja starfsumhverfi sem eykur ánægju og skilvirkni.

2. Fjármál

Markmið:
Að tryggja sjálfbærni safnsins og stöðugleika í fjármálum og nýta fjármuni á sem skilvirkasta hátt.

Umræða og leiðir að markmiði:

Sækja fjárveitingar frá opinberum aðilum, sjóðum og einkaaðilum.
Kanna möguleika á sértekjum, t.a.m. í gegnum sölu á varningi sem byggir á safnkosti, sérsniðnum lausnum í menningartengdri ferðaþjónustu og útleigu á rými fyrir minni viðburði (í kjölfar stækkunar).
Byggja fjárhagsáætlun á langtímaáherslum sem hámarka sjálfbærni og fjárhagslegt öryggi safnsins.

Mælingar á árangri:

Áætlaðar og raunverulegar tekjur safnsins (niðurstöður ársreikninga).
Umfang styrkúthlutana til safnsins.
Aukning sértekna.

Athugasemdir:
Fjármál safnsins eiga að vera sveigjanleg og styðja við langtímaáætlanir þar sem markmiðið er að tryggja áframhaldandi vöxt og sjálfbærni í starfseminni.

3. Safnkostur

Markmið:
Að byggja upp og viðhalda safnkosti sem endurspeglar menningararf svæðisins og gegnir mikilvægu hlutverki í varðveislu menningarminja, sögu og sjálfsmyndar samfélagsins.

Umræða og leiðir að markmiði:

Framfylgja söfnunarstefnu safnsins og markvissri söfnun muna með áherslu á svæðisbundinn menningararf.
Unnið sé eftir skýrum reglum um varðveislu muna t.a.m. hvað varðar geymslu og forvörslu.
Í tengslum við húsnæðisbreytingar verði unnið eftir samþykktri grisjunaráætlun og farið í markvissa og vel ígrundaða grisjun úr safnkosti.
Tryggja að safnkostur sé vel skráður í menningarsögulega gagnasafninu Sarpi, varðveittur og aðgengilegur til skoðunar, t.a.m. með sveigjanleika í opnunartíma, nýjum lausnum í miðlun og inngildingu ólíkra þjóðfélagshópa.

Mælingar á árangri:

Fjöldi nýrra safngripa sem safnið hefur bætt við safnkost sinn árlega.
Ástand geymsla og skipulag (sjá m.a. úttektir Safnaráðs).
Umfang grisjunar safnkosts.
Staða safnkosts hvað varðar skráningu, varðveislu og frágang.
Gestatalningar og -kannanir, fyrirspurnir um safnkost og fjöldi rannsókna.

Athugasemdir:
Það er mikilvægt að safnið varðveiti safnkostinn í samræmi við gildandi reglur og gagnreyndar aðferðir, að safnkosturinn sé aðgengilegur og til vitnis um menningu og sögu Austurlands.

4. Sýninga- og viðburðahald

Markmið:
Að bjóða upp á fjölbreyttar og aðlaðandi sýningar og viðburði sem stuðla að miðlun og skilningi á menningararfinum.

Umræða og leiðir að markmiði:

Unnin verði viðburðaáætlun til þriggja ára sem nái utan um allar sýningar sem tengjast menningararfi og sögu svæðisins, viðburði, fræðslustarf og aðrar uppákomur sem gestum standa til boða.
Skipuleggja viðburði og fræðslu sem eru til þess fallnir að efla þátttöku almennings og vera inngildandi.
Þróa nýjar leiðir til miðlunar safnkostsins, s.s. stafrænar, með það að markmiði að auðvelda aðgengi og ná til breiðari hóps gesta.
Skapandi leiðir við kynningu á því sem safnið hefur upp á að bjóða, m.a. með samstarfi við ferðaþjónustuaðila.

Mælingar á árangri:

Gildandi viðburðaáætlun.
Fjöldi sýninga og viðburða sem haldnir eru árlega.
Fjöldi gesta og þátttaka í viðburðum.
Ánægja gesta mæld með könnunum eftir sýningar og viðburði.

5. Rannsóknir, tengsl, samstarf

Markmið:
Að efla rannsóknir á menningararfinum og styrkja samstarf við höfuðsafn, önnur söfn, safnvísa og menningarstofnanir innan svæðis og utan, sem og erlendis.

Umræða og leiðir að markmiði:

Hvetja til og stuðla að rannsóknum sem tengjast safnkosti og safninu, m.a. með því að sækjast eftir samstarfi við vísinda- og listafólk eða aðra áhugasama.
Efla samstarf við aðrar menningar- og fræðastofnanir bæði innanlands og utan, t.d. í gegnum fagfélög, ráðstefnur, verkefni og óformlegar heimsóknir.
Auka tengsl við samfélagið og bæta þjónustu safnsins með því að hlusta eftir skoðunum, þörfum og óskum heimafólks og gesta.

Mælingar á árangri:

Fjöldi rannsókna og verkefna sem safnið tekur þátt í eða styrkir.
Rannsóknarverkefni eða samstarfsverkefni sem hafa verið útfærð með öðrum aðilum, innan svæðis sem utan.
Ánægja samstarfsaðila og fræðimanna (viðhorfskannanir í lok samstarfs).

Athugasemdir:
Samstarf við aðrar stofnanir er lykilatriði til að auka áhrif safnsins, sérstaklega þegar kemur að rannsóknum og miðlun menningararfs.

6. Útgáfa og miðlun

Markmið:
Að miðla menningararfi safnsins á árangursríkan hátt og til breiðs hóps gesta.

Umræða og leiðir að markmiði:

Nýta stafræna miðla, vefsíðu og samfélagsmiðla til að ná til breiðari hóps gesta.
Þróa efni út frá sýningum, viðburðum og rannsóknum og gera það aðgengilegt fyrir bæði heimamenn og ferðamenn.
Vera vakandi fyrir tækifærum til miðlunar sem koma upp í tengslum við atburði og umræðu í samfélaginu.

Mælingar á árangri:

Ánægja gesta með miðlun efnis og upplýsingagjöf safnsins.
Nýting á miðlum safnsins.
Mat á fjölda og gæðum efnis á miðlum safnsins.
Fjölbreytni leiða við miðlun.

Athugasemdir:
Aðgengileg og fjölbreytt miðlun á menningararfinum er lykillinn að því að ná til ólíkra þjóðfélags- og aldurshópa og auðvelda tengsl við safnið og það sem það hefur að bjóða.

7. Sjálfbærni

Markmið:
Að stuðla að sjálfbærri þróun í öllum þáttum starfseminnar.

Umræða og leiðir að markmiði:

Rækta tengsl við nærsamfélagið með því að vera vettvangur til að mæta þörfum þess. Markvisst skal boðið upp á fræðslu um sjálfbærni á öllum sviðum og taka þátt í verkefnum sem stuðla að sjálfbærni og endurvinnslu.
Innleiða markmið Grænna skrefa í rekstri safnsins með það fyrir augum að draga úr neikvæðum umhverfisáhrifum af starfseminni og efla umhverfisvitund starfsmanna.
Eiga frumkvæði að samstarfi og samvinnu um sýningar, viðburði og uppákomur, t.a.m. með ferðaþjónustuaðilum á svæðinu um þróun menningartengdrar ferðaþjónustu.
Safnkostur er sjálfbær. Unnið er eftir markvissri söfnunarstefnu og ábyrgri grisjunarstefnu með það að markmiði að safnkosturinn nýtist.

Mælingar á árangri:

Fjöldi viðburða og fræðslu um sjálfbærni.
Fjöldi verkefna sem unnin eru m.a. undir merkjum sjálfbærni og safnið tekur þátt í.
Orkusparnaður og minnkun kolefnisspors safnsins.
Nýting safnkostsins.

Við gerð starfsstefnunnar var litið til Safnastefnu á sviði menningarminja (2017), Menningarstefnu Múlaþings (2024-2030), Sóknaráætlunar Austurlands (2020-2024) og Svæðisskipulags Austurlands (2022-2044).

Samþykkt á fundi stjórnar Minjasafns Austurlands þann ____________ 2025.