Yfirstandandi sérsýningar

Sýningin Kjarval á Austurlandi stendur nú yfir í Sláturhúsinu á Egilsstöðum. Sýningin er sett upp af Minjasafni Austuralnds og er hluti af stærra verkefni sem þrjár menningarstofnanir á Austurlandi standa að.

Sýningin fjallar um líf listamannsins Jóhannesar Sveinssonar Kjarval og tengsl hans við Austurlands. Þar skipa persónulegir hlutir listamannsins sem varðveittir eru á Minjasafninu stóran sess og leitast er við að varpa ljósi á persónuna Kjarvals og tengja saman verk hans og umhverfið sem þau eru sprottin úr.

Í tengslum við sýninguna og BRAS, menningarhátíð barna og ungmenna á Austurlandi, mun Sláturhúsið setja upp leiksýninguna Kjarval í samstarfi við Borgarleikhúsið síðar haust. Þar er um að ræða fjölskylduleikrit sem fyrst var sett upp í Borgarleikhúsinu árið 2021 en í því er dregin upp mynd af Kjarval, drengnum, manninum og málaranum. Ákveðnum árgöngu grunnskóla á svæðinu verður boðið á leiksýninguna og þeim verður einnig boðið að nýta fræðsluverkefni sem sett hefur verið saman í tengslum við sýningarnar.

Þriðji og síðasti hluti verkefnisins verður svo í höndum Skaftfells á Seyðisfirði en þar er ætlunin að setja upp sýningu með verkum Kjarvals sumarið 2025.

Verkefnastjóri og höfundur sýningarinnar Kjarval á Austurlandi er Hanna Christel Sigurkarlsdóttir, grafísk hönnun var í höndum Ingva Arnar Þorsteinssonar og Óttar Brjánn Eyþórsson sá um smíði. Marcellvs L sá um tökur og vídeóvinnsla og ljósmyndun var í höndun Juanjo Ivaldi Zaldívar

Verkefnið er styrkt af Uppbyggingarsjóði Austurlands, Safnasjóði, Múlaþingi, Landsvirkjun, Alcoa, Atlantsolíu, MVA og List fyrir alla.

Sýningin er opin á opnunartíma Sláturhússins: 
Þriðjudaga - föstudaga: 11:00-16:00
Laugardaga: 13:00-16:00

Sumarsýning Minjasafns Austurlans árið 2024 ber yfirskriftina Landnámskonan. Tvær ríkulega búnar landnámskonur skipa heiðurssess á sýningunni, annars vegar höfðingjakonan sem hvíldi í einu kumlinu sem grafið var upp í Firði á Seyðisfirði árið 2021 og hins vegar fjallkonan dularfulla sem fannst í hellisskúta á Vestdalsheiði upp af Seyðisfirði árið 2004. Bæði kumlin í Firði og líkamsleifar fjallkonunnar eru frá því um 950 og því ljóst að hinar látnu hafa verið uppi á sama tíma. Á sýningunni eru niðurstöður rannsókna á þessum fornleifafundum nýttar til að beina sjónum að konum á þessum tíma, lífi þeirra og störfum.

Sýningin er samstarfsverkefni Minjasafns Austurlands, Antikva, Rannsóknarseturs HÍ á Austurlandi og Þjóðminjasafns Íslands. Sýningar höfundur er Rúna K. Tetzschner en auk hennar voru í sýningarnefnd þær Ragnheiður Traustadóttir, Rannveig Þórhallsdóttir og Elsa Guðný Björgvinsdóttir. Um hönnun og uppsetningu sá Hanna Chriestel Sigurkarlsdóttir og grafísk hönnun var í höndum Ingva Arnar Þorsteinssonar.

Sýningin er auk þess hluti af sýningaröð þriggja safna á Austurlandi sem ber yfirskriftina Konur / Women. Auk Minjasafnsins Austurlands beina Tækniminjasafn Austurland og Héraðsskjalasafn Austfirðinga sjónum sínum að konum á sumarsýningum sínum. Á sýningu Tækniminjasafnsins er dregin upp mynd af störfum kvenna á Seyðisfirði um aldamótin 1900 með áherslu á reynsluheim þeirra og framlag til atvinnulífsins; á Héraðsskjalasafninu verður sögð saga Margrétar Sigfúsdóttur, 20. aldar verkakonu, kennara og skálds í Fljótsdal.

Nú stendur yfir á Sarpi vefsýningin Kjarval - Gripirnir úr bókinni. Þar er hægt að skoða nánar þá gripi sem birtust í bókinni Kjarval: Málarinn sem fór sínar eigin leiðir sem kom út á síðasta ári. 

Í bókinni segir Margrét Tryggvadóttir sögu Jóhannesar Sveinssonar Kjarval, eins ástsælasta listamanns þjóðarinnar, á heillandi og aðgengilegan hátt. Bókina prýðir fjöldi mynda, m.a. af hlutum sem voru í eigu Kjarvals og eru nú varðveittir á Minjasafni Austurland og eru þeir allir til sýnis á vefsýningunni nýju.  

Við hvetjum sýningargesti til að setjast niður við tölvuna með bókina við höndina, skoða hana samhliða sýningunni og reyna að finna alla gripina á síðum bókarinnar. Einnig hafa þrír auka gripir sem ekki eru í bókinni laumað sér með á sýninguna. Getur þú fundið þá?

Minjasafn Austurlands varðveitir mun fleiri gripi úr eigu Kjarvals en þá sem birtust í bókinni. Myndir og upplýsingar um þá eru einnig aðgengilegar á Sarpi, sjá hér.