Undanfarið hefur safnstjóri Minjasafns Austurlands lagt drög að stóru verkefni, nánar tiltekið sýningu, í samstarfi við Náttúrustofu Austurlands og Þorpið, og ótal fleiri aðila, sem tengist náttúru- sögu og menningu Austurlands og er efnið sambúð manna og hreindýra, frá því þessi villtu dýr komu í fjórðunginn. Verkefnið verður til húsa í Minjasafninu en þemað er sameign Austurlands og því munu margir á meðan unnið verður að verkefninu verða til kallaðir um ráð og ábendingar, efni, muni og heimildir. Safnað verður efni í máli og myndum, efni á léttum og alvarlegum nótum, fræðilegu efni og skáldskap, og öllu þar á milli, sem og ýmsum gripum og allra handa myndefni og tónlist. Um margmiðlunarhluta verkefnisins sér hönnunarfyrirtækið Gagarín en það fyrirtæki sérhæfir sig í hönnun á gagnvirkum lausnum og stafrænu efni fyrir söfn og sýningar.

Fjármögnun stendur yfir enda er verkefnið stórt. Þann 4. desember 2013 úthlutaði stjórn Vina Vatnajökulsþjóðgarðs styrk til 22 verkefna. Hæsta styrkinn í úthlutun að þessu sinni hlaut Minjasafn Austurlands til ofangreinds verkefnis sem ber yfirskriftina; Hreindýr og menn: Sýning um sambúð manna og hreindýra á Austurlandi. Minjasafnið þakkar Vinum Vatnajökuls fyrir stuðninginn sem mun skipta mjög miklu fyrir verkefnið og óskar öðrum styrkhöfum til hamingju.