Um 100 manns lögðu leið sína í Safnahúsið á sumardaginn fyrsta en þá stóðu söfnin þrjú fyrir afmælisfagnaði og opnu húsi.

Tilefni hátíðahaldanna voru að árið 2016 eru 60 ár liðin frá stofnun Bókasafns Hérðasbúa, 40 ár frá stofnun Héraðsskjalasafns Austfirðinga og 20 ár frá því að Safnahúsið var formlega opnað. Flutt voru ávörp, stúlknakórinn Liljurnar tók lagið og gestum boðið að þyggja veitingar, skoða sýningar og kynna sér starfsemi safnanna.

Kristrún Jónsdóttir (Dúrra) sem starfaði á Bókasafninu um árabil sagði frá störfum sínum á safninu, flutningum milli húsa í bænum og bókum sem alltaf týndust. Steinunn Kristjánsdóttir, fyrsti safnstjóri Minjasafnsins, lýsti flutningum safnkosts Minjasafnsins úr geymslum í ný húsakynni í Safnahúsinu og starfseminni fyrstu árin í húsinu. Þá sagði Arndís Þorvaldsdóttir sem hefur starfað á Héraðsskjalasafninu um árabil, skemmtilegar sögur úr starfi safnsins. 

Í tilefni dagsins settu starfskonur Minjasafnsins upp sýningu sem ber yfirskriftina 20 ár í Safnahúsi en hún samanstendur af munum úr öllum söfnunarflokkum Minjasafnsins og er ætlað að sýna fjölbreytileika safnkostsins. 

Myndir: Gunnar Gunnarsson og Jóhanna Hafliðadóttir