Alþjóðlegi safnadagurinn er haldinn hátíðlegur um allan heim 18. maí. Þema dagsins í ár er: Söfn og umdeildar sögur - að segja það sem ekki má segja í söfnum.

Í tilefni dagsins vekur Minjasafnið sérstaka athygli á ljósmyndasýningunni Minningar um torfhús sem nú stendur yfir í Safnahúsinu. Á sýningunni eru 25 ljósmyndir sem franski fornleifafræðingurinn Sandra Coullenot hefur tekið af gömlum byggingum vítt og breitt um Ísland. Ljósmyndirnar eru hluti af doktorsverkefni Söndru en í rannsóknum sínum skoðar hún m.a. hvort og hvernig torfhús hafa haft áhrif á íslenska sagnahefð og notar til þess bæði aðferðir þjóðfræði og fornleifafræði.

Sandra vonast til að sýningin veki upp minningar og hugrenningar sem sýningargestir tengja við torfhús. Sérstakur minningarkassi er á sýningunni og eru gestir hvattir til að skrifa hugrenningar sínar á miða sem hægt er að stinga í kassann, bæði jákvæðar sögur og líka "sögur sem ekki má segja".

Sýningin er á neðstu hæð Safnahússins fyrir framan Héraðsskjalasafnið. Hún er sett upp í samstarfi við söfnin í Safnahúsinu og Gunnarsstofnun á Skiðuklaustri.