Um þessar mundir eru 70 ár frá því að Egilsstaðahreppur var formlega stofnaður og þéttýli tók að myndast við Gálgaás.

Af því tilefni hafa Minjasafn Austurlands og Héraðsskjalasafn Austfirðinga tekið höndum saman og sett upp sýningu sem ber heitið Þorpið á Ásnum. 

Sýningin var opnuð í Sláturhúsinu á 17. júní að viðstöddu fjölmenni og við sama tilefni voru tvær aðrar sýningar opnaðar í húsinu. Annars vegar sýningin Amma sem er textílinnsetningu Guðnýjar G. H. Marinósdóttur byggð á lífshlaupi föðurömmu hennar, Guðnýjar Einarsdóttur og hins vegar sýningin Fædd í Sláturhúsinu sem er samsýning níu listamanna frá fjórum löndum.

Á sýningunni Þorpið á Ásnum eru til sýnis  ljósmyndir, skjöl, munir, hljóð- og myndefni sem allt tengist þéttbýlinu á Egillsstöðum á einn eða annan hátt. Sýningunni er ekki ætlað að vera tæmandi saga Egilsstaða heldur hafa skipuleggjendur dýft hendinni ofan í minningakistuna og dregið upp hluti sem eru til þess fallnir að vekja upp minningar hjá eldri kynslóðinni. Um leið vonumst við til að tækifæri skapist fyrir þá sem yngri eru til að fræðast um þá sem á undan þeim gengu um götu bæjarins. 

Perla Sigurðardóttir hjá PES ehf sá um hönnun og uppsetningu sýningarinnar en Fljótsdalshérað styrkti verkefnið. 

Sýningin verður opin á opnunartíma Sláturhússins fram til 15. september. 

Hér fyrir neðan má sjá nokkrar myndir frá opnuninni.