Nú er þorri genginn í garð með öllum sínum hefðum og siðum. Þá er líflegt í safnfræðslu Minjasafnsins.

Í gegnum tíðina hafa kennarar verið duglegir að nýta þorrann til að kynna menningar- og matararf þjóðarinnar fyrir nemendum sínum. Er það ekki að undra því þessi árstími er vel til þess fallinn að huga að því hvernig líf fólks var í gamla daga, hvað þurfti til að þreyja þorrann, hvernig matur var unninn og geymdur, hvernig tímatalið var og sitt hvað fleira.

Minjasafnið leggur sitt af mörkum til þessarar fræðslu. Auk þess að bjóða upp á fræðslu tengda þorranum fyrir bæði leik- og grunnskóla, sviptum við í dag hulunni af nýjasta pakkanum í námsefni Minjasafnsins sem unnið er í samstarfi við námsefnisútgáfuna Kennarinn.is. Pakkinn er ætlaður miðstigi og þar er fjallað um þorrann og ýmislegt sem honum tengist á nýstárlegan og líflegan hátt. Námsefni Minjasafnsins inniheldur einnig pakka um þorrann ætlaðan yngsta stigi.

Námsefni Minjasafnsins er hugsað sem stuðningur við heimsóknir skóla á safnið en þó er einnig lagt upp með að þeir kennarar sem ekki eiga þess kost að koma með nemendur sína í heimsókn geti nýtt efnið við sína kennslu og þannig skyggnst inn um glugga safnsins í gegnum netið.

Hægt er bóka skólaheimsóknir með því að hafa samband á netfangið This email address is being protected from spambots. You need JavaScript enabled to view it. eða í síma 471-1412