Þegar aðventan gengur í garð er Safnahúsið klætt í jólabúninginn og starfsfólkið byrjar að telja niður til jóla. Við viljum endilega leyfa ykkur að telja niður til jóla með okkur með sérstöku jóladagatali Minjasafnsins. Í hverjum glugga dagatalsins má finna einn grip úr safnkosti safnsins sem tengist jólunum með einum eða öðrum hætti.  Það kennir ýmissa grasa í þeim efnum og alls ekki ólíklegt að margir gripanna muni vekja upp góðar minningar tengdar jólunum.  Við hvetjum alla til að fylgjast með og jafnvel verður hægt að skoða hlutina í návígi í anddyri Safnahússins.  

En það er margt fleira á döfinni því að fimmtudaginn 5. desember bjóða Minjasafnið og Bókasafnið til notalegrar fjölskyldusamveru frá 16:00-18:00.

Á Minjasafninu geta gestir prófað að steypa tólgarkerti undir handleiðslu Guðrúnar Sigurðardóttur. Einnig verður hægt að læðast um sýningarsalinn í litlum jólaratleik, dunda sér við margvíslega jólalega afþreyingu og skoða jólatré fyrri tíma.

Á Bókasafninu svigna hillurnar undan nýjum bókum sem jólabókaflóðið hefur skolað upp á strendur safnsins. Gestir geta líka sest niður og föndrað jólaskraut úr bókum og öðrum hefðbundnari hráefnum.

Allar sýningar opnar. Síðustu forvöð að skoða sýninguna Eftirlýstir Íslendingar á 17. og 18. öld.

Ókeypis aðgangur. Tilvalið fyrir fjölskyldur að líta við á þeim tíma sem þeim hentar og eiga notalega stund í friði fyrir jólaösinni.