Ráðstefna: Kallað eftir erindum

Félag Þjóðfræðinga á Íslandi og Minjasafn Austurlands kalla eftir erindum fyrir ráðstefnu sem þau standa fyrir í maí. 

Félag Þjóðfærðinga á Íslandi hefur í gegnum tíðina staðið fyrir landsbyggðarráðstefnum víða um land í samstarfi við safn eða fræðastofnun á viðkomandi stað. Að þessu sinni verður ráðstefnan haldin á Egilsstöðum, 15.-17. maí næstkomandi og í samstarfi við Minjasafn Austurlands. 

Yfirskrift og þema ráðstefnunnar eru Vegamót sem vísar til þess að á ráðstefnunni mætist fólk úr ólíkum áttum; fólk frá ólíkum landshornum, fólk úr ýmsum fræðigreinum, nemar á ýmsum stigum í námi, áhuga- og fræðafólk. Þar mætast líka ólík viðfangsefni, hugmyndir, aðferðir og nálganir, fortíð og nútíð og hinir ýmsu krókar og kimar mannlífsins. Vegamót standa líka fyrir hreyfanleika, ferðalög og breytingar. Þegar komið er að vegamótum er venjan að staldra við, horfa í kringum sig, kanna ólíka möguleika og jafnvel líta yfir farinn veg. Svo þarf að ákveða hvort breyta eigi um stefnu eða halda áfram á sömu leið. Yfirskriftin vísar einnig til staðsetningar ráðstefnunnar á Egilsstöðum en þeir hafa í gegnum tíðina verið nefndir vegamót Austurlands.

Þau sem hafa áhuga á að flyta erindi á ráðstefnunni eru beðin um að senda titil og stutt ágrip (200-300 orð) á netfangið This email address is being protected from spambots. You need JavaScript enabled to view it. fyrir 1. mars næstkomandi. Öllum er frjálst að senda inn erindi. 

Áhugasömum er jafnframt bent á Facebook-viðburð ráðstefnunnar, þar koma inn nánari upplýsingar eftir því sem nær dregur.