Torfhúsið Lindarbakki er eitt helsta kennileiti á Borgarfirði eystra enda er húsið mikil bæjarprýði.

Húsið var byggt árið 1899 og eru hlutar þess enn upprunalegir. Elísabet Sveinsdóttir (Stella á Lindarbakka)  og eiginmaður hennar heitinn, Skúli Ingvarsson, keyptu húsið árið 1979 og nýttu eftir það sem sumardvalarstað. Síðastliðið sumar afhenti Stella Borgarfjarðarhreppi húsið formlega til eignar.

Minjasafn Austurlands hlaut nú í sumar styrk í gegnum byggðaþróunarverkefnið Betri Borgarfjörður til að skrá munina sem tilheyra húsinu. Markmiðið er útbúa heilstæða skrá yfir gripina í húsinu, með myndum og upplýsingum um uppruna þeirra og sögu. Eyrún Hrefna Helgadóttir, þjóðfræðingur og starfsmaður Minjasafnsins, fer fyrir verkefninu en hægt er að fylgjast með framvindu þess í máli og myndum á Facebook og Instagram (@lindarbakki).