List fyrir alla hefur opnað nýjan vef þar sem nálgast má yfirlit yfir öll menningarhús, sýningar, söfn og setur sem miðla list og menningu til barna og ungmenna. Minjasafn Austurlands er að sjálfsögðu þar á meðal.

List fyrir alla er verkefni á vegum mennta- og menningarmálaráðuneytisins sem hefur verið starfrækt síðastliðin fimm ár. Markmið þess er að miðla listviðburðum til barna og ungmenna um land allt og jafna þannig aðgengi þeirra að fjölbreyttum og vönduðum listviðburðum óháð búsetu og efnahag. Á vef verkefnisins List fyrir alla er að finna ítarlegar upplýsingar um barnamenningu og listviðburði fyrir ungt fólk sem gagnast bæði skólum og fjölskyldum. Á nýja vefnum er hægt að fara í ferðalag um landið og kynna sér margvíslega menningarmöguleika fyrir börn og ungmenni á hverjum stað.

Listi Austurlands er fjölbreyttur og glæsilegur. Þar má meðal annars finna upplýsingar um Minjasafn Austurlands og marga fleiri skemmtilega og áhugaverða staði í fjórðungnum.