Jólahefðir héðan og þaðan: Rússland

22. desember 2022

Næsti viðkomustaður í jólaferð okkar um heiminn er Rússland. Elena Pétursdóttir kemur frá Rússlandi en hefur búið á Seyðisfirði frá 2007 og vinnur sem bókari hjá Múlaþingi. Hún lýsir jólunum í Rússlandi á þessa leið:

„Í Rússlandi eru jólin ekki jafn stór og hátíðleg og á Íslandi en ég á mjög góðar minningar frá því um jólin þegar ég var lítil. Ég man vel eftir að hafa föndrað mikið jólaskraut allan desember. Við nýttum greinar og köngla en líka pappír, gömul dagblöð og jólakort til að búa til skraut og við vorum með jólatré sem við skreyttum. Þar er hins vegar 31. desember sem er hátíðlegastur og sá dagur sem maður hlakkar mest til. Ástæðan fyrir því er sú að eftir októberbyltinguna 1917 voru jólin bönnuð og meiri áhersla lögð á að fagna nýju ári. Eftir fall Sovétríkjanna voru jólin aftur leyfð en spenningurinn fyrir gamlársdag hefur haldið sér. Opinbert jólafrí er frá 31. desember til 10. janúar. Dagurinn fyrir gamlársdag fer í að undirbúa matinn sem er hlaðborð með alls kyns réttum. Fjölskyldan mín skálar alltaf kl. 16 vegna þess að móðurbróðir minn býr á eyjunni Sakalín sem er nálægt Japan og þar er 8 klukkustunda tímamunur. Allt kvöldið snýst um að borða og vera saman og allir eru glaðir og kátir. Ein skemmtileg hefð er að skrifa ósk fyrir nýja árið á lítinn miða, brenna hann og setja svo öskuna í kampavínið og drekka. Á miðnætti er skálað í kampavíni og sumir fara jafnvel út og safnast saman, dansa í kringum jólatré, skála og fagna. Andrúmsloftið er vinsamlegt og mikil kátína hjá fólki. Þetta er eini dagurinn sem ég upplifi heimþrá.

Í Rússlandi eru jólin haldin 7. janúar. Fyrir mér tengist sá dagur ekki endilega kirkjunni og hann er mjög lágstemmdur. Við eldum mat og erum með fjölskyldunni. Við erum með jólasvein sem heitir „afi Frost“ og er gamall góðlegur maður sem er með aðstoðarmann sem er lítil stúlka sem hjálpar honum að gefa gjafir. Allir fá gjafir hvort sem maður hefur verið þægur eða óþægur og við erum ekki með neina hræðilega fígúru eða veru sem börnin óttast.“

Hér er svo uppskrift af hunangsköku sem er vinsæl um hátíðirnar í Rússlandi:  https://momsdish.com/recipe/101/russian-honey-cake

Myndir:
Rússneski jólasveinninn: Afi Frost og aðstoðarstúlkan
Hátíðleg hunangskaka
Nýárstré

20221222 3
20221222 2
20221222 1

Síðustu fréttir

Gripur mánaðarins - Febrúar
01. febrúar 2023
Þó það sé gaman að leika úti í snjónum þá er líka gott að geta leitað inn í mesta kuldanum! Þá er gott að geta gripið í gott spil, en nóg er til af þeim í safnkosti Minjasafnsins eins og víðar....
Óhefðbundnar sauðfjárlækningar - fyrirlestur í Safnahúsinu
31. janúar 2023
Þriðji fyrirlesturinn í fyrirlestrarröðinni Nýjustu fræði og vísindi fer fram í Safnahúsinu á Egilsstöðum fimmtudaginn 9. febrúar kl. 17:00. Þar mun Hrafnkatla Eiríksdóttir snýkjudýra- og þjóðfræði...
Viðburðaríkt 2022
10. janúar 2023
Gleðilegt ár! Nú þegar nýtt ár er gengið í garð er viðeigandi að líta um öxl og fara yfir það sem stóð upp úr í starfsemi safnsins á árinu 2022.  Segja má að árið hafi farið rólega af stað...

Minjasafn Austurlands
Laufskógar 1 • 700 Egilsstaðir
This email address is being protected from spambots. You need JavaScript enabled to view it. 471 1412 
Kt. 630181-0119

PES - vefum og hönnum