Minjasafn Austurlands fékk  tvo styrki úr aðalúthlutun Safnasjóð í ár en Lilja Dögg Alfreðsdóttir, menningarmálaráðherra, afhenti styrkina við hátíðlega athöfn í Þjóðminjasafni Íslands í gær.

Annar styrkurinn var veittur í safnfræðsluverkefnið Skapandi arfleifð sem Minjasafnið stendur fyrir í tengslum við BRAS, menningarhátíð barna og ungmenna á Austurlandi. Þetta verður í fjórða sinn sem safnið býður skólum á starfssvæði sínu upp á verkefni þar sem þau fá fræðslu um menningararfinn í gegnum skapandi vinnu undir handleiðslu listafólks. Í fyrsta skiptið var unnið með þjóðsögur Sigfúsar Sigfússonar, árið eftir var Valþjófsstaðahurðin nýtt sem innblástur, í fyrra unnu nemendur með álfkonudúkinn frá Bustarfelli og í ár verður unnið með óáþreifanlegan menningararf. 

Hinn styrkurinn var veittur í verkefnið Leyndardómar Valþjófsstaðahurðarinnar en þar er um að ræða spennandi samstarfsverkefni Minjasafns Austurlands og Þjóðminjasafns Íslands en söfnin hyggjast taka höndum saman og gefa út sérstakt fræðslu- og leikjahefti fyrir börn þar sem sögu hurðarinnar verður miðlað í gegnum skapandi og skemmtileg verkefni.

Jóhanna Bergmann, fyrrverandi safnstjóri Minjasafns Austurlands og núverandi starfsmaður Þjóðminjasafns Íslands, veitti styrkjunum viðtöku fyrir hönd Minjasafnsins. Hún er einmitt einn fulltrúa Þjóðminjasafnsins í samstarfsverkefninu um Valþjófsstaðahurðina. 

Áður hafði safnið fengið tvo styrki úr aukaúthlutun Safnasjóðs, annars vegar til að sækja Farskólann, árlega fagráðstefnu safnafólks sem að þessu sinni fer fram í Hollandi og hins vegar í fyrirlestrarröðina Nýjustu fræði og vísindi sem safnið stendur fytrir ásamt Héraðsskjalasafni Austfirðinga, Rannsóknarsetri HÍ á Austurlandi, Gunnarsstofnun, Hallormsstaðaskóla og Sögufélagi Austurlands. 

Mynd: Safnaráð