Eins og glöggir vegfarendur um vefinn hafa ef til vill tekið eftir er merki Minjasafns Austurlands komið í nýjan búning. Breytingin er tímabundin og gerð í tilefni af því að í ár verða 80 ár liðin frá því að Minjasafn Austurlands var formlega stofnað en stofnfundur þess fór fram á fundi á Hallormsstað 10.-11. október árið 1943. Í tilefni tímamótanna var ákveðið að setja merki Minjasafnsins í í tímabundinn afmælisbúning og minna þannig á þá löngu sögu sem safnið á að baki. Ýmislegt fleira er á döfinni í tengslum við afmælisárið og vert að hvetja fólk til að fylgjast með á vef og samfélagsmiðlum safnsins.