Í vetur hafa nemendur leikskólans Tjarnarskógar sem fæddir eru árið 2019 heimsótt Minjasafn Austurlands reglulega í litlum hópum. Hver hópur hefur komið fjórum sinnum á safnið og samtals hafa þetta verið 16 heimsóknir.

Í heimsóknunum er fjallað um líf fólks í gamla torfbæjarsamfélaginu og mismunandi viðfangsefni eru tekin fyrir í hverri heimsókn, þ.e. híbýli, matur, föt og síðast en ekki síst leikir barna. Jafnframt fá nemendur að kynnast því hvers konar staðir söfn eru, hvernig hlutir er geymdir þar og þeim umgengnisreglum sem þar gilda. Lögð er áhersla á að leyfa börnunum að snerta, prófa og nýta frjálsan leik eins og kostur er.

Þetta vel heppnaða samstarf safnsins og leikskólans hefur staðið yfir um árabil og er alltaf jafn gefandi. Síðasti hópur vetrarins heimsótti safnið nú á dögunum og við hlökkum mikið til að taka á móti næsta árgangi þegar hausta tekur.